【聲明】港生活網站並無進行電話推廣活動

基層家庭坐世界夢號 啟迪潛能發展

發佈時間: 2018/04/16
  • 1,000次
    分享

黛安唔少朋友都喜歡喺郵輪上享受假期,但其實郵輪旅遊對基層嚟講可能係遙不可及嘅事情。為咗畀基層家庭嘗試郵輪體驗,星夢郵輪噚日邀請咗83位兒童發展基金嘅受惠學員,同家人一齊登上「世界夢號」,除咗享受郵輪旅遊樂趣,仲可了解郵輪上不同工作崗位,提升學員們對郵輪旅遊業工作嘅興趣!

黛安噚日同其中一位學員曾勁麟傾過,喺香港航海學校讀緊中四嘅佢話,今次係佢第一次搭郵輪,佢自細已好鍾意大海,夢想成為遠洋船長。今次佢有機會同「世界夢號」船長直接對話,有望幫佢認定自己嘅發展路向!星夢郵輪總裁戴卓爾‧布朗話,希望藉「Dream Cruises乘夢啟航」活動,幫年輕人發現自己嘅潛能,啟發佢哋努力實踐夢想。黛安祝各位年輕人喺旅程同夢想道路上都一帆風順!

撰文: 黛安 消息特靈八卦公關
欄名: 八卦名利場