香港電子業總會 新書回顧30年發展史

唔經唔覺香港工業總會轄下嘅香港電子業總會（HKEIC）今年已踏入30周年，黛安喺上個星期五（13日）就出席咗一系列慶祝活動，包括喺會展嘅春季電子產品展舉行嘅《香港電子業穩步向前-回顧與前瞻》紀念書刊嘅新書發布會，同周年晚宴兼「香港電子業傑出成就獎」頒獎禮。

黛安喺新書發布會，見到工業總會主席郭振華、電子業總會主席莊子雄（Steve）、副主席謝鴻強（Christopher）等名人。郭主席致辭時就講，工業總會一直積極同港府攜手推動電子業發展，HKEIC過去30年亦協助各電子業界交流，令業界能與時並進。

Steve同黛安講，香港電子業已發展60幾年，多年來孕育咗唔少傑出翹楚，仲創造咗好多家傳戶曉嘅產品，包括50年代嘅原子粒收音機，到今日嘅物聯網裝置等。

至於當日發布嘅新書，就係由Christopher做編輯委員會主編，紀念同回顧業界幾十年來嘅發展，Christopher同黛安講，今次訪問咗超過30位業界代表，分享成功同挫敗經驗，希望新一代透過呢班前輩嘅分享，可以做到承先啟後，再創高峰。

當晚嘅周年晚宴，仲請到創科局局長楊偉雄、商經局副局長陳百里等高官做主禮嘉賓，今年仲特別設立「香港電子業傑出成就獎」，表揚一班對香港電子業有卓越成就同貢獻嘅人士，希望鼓勵多啲年輕人入行。