侷着爛裙遲大到 真空陳瀅內疚爆喊

陳瀅昨日與好姊妹劉佩玥（Moon）出席化粧品活動，不過二人竟然遲足45分鐘才相繼現身。原來陳瀅在活動前不慎整爛裙，無計可施下惟有真空上陣，她狼狽得忍不住當場落淚，認真陰公豬。

姍姍來遲的陳瀅穿上淺藍色連身裙現身，自知遲大到的她一到場即連聲道歉，坦言昨日諸事不順︰「我由尖沙咀坐車過嚟銅鑼灣，點知遇上撞車，塞得好緊要；嚟到又發現條裙爛咗，經理人已立刻幫我買另一條裙，但本身條裙拉鏈卡住咗除唔到，搞到後面穿咗個窿，索性除咗個Bra。」她尷尬表示被迫真空上陣，自言要大家等待十分內疚︰「以後出街要帶定多一件衫同鉸剪，如果除唔到衫就剪爛佢，依家又尷尬又內疚又對唔住。」說罷即忍不住當場落淚，老友阿Moon見狀即攬實安慰。

劉佩玥為周志文打氣

同場的阿Moon雖然沒有爆裙，但原來她義氣行先，不想掉低陳瀅先行到場，結果雙雙遲到。早前阿Moon病倒入院，原來是腸胃淋巴發炎︰「之前以為只係肚痛，但痛到好似扭毛巾咁，卒之入院住咗一晚檢查。我咁大個女第一次咁着緊健康，我Keep住入院嘅手帶，提醒自己要珍惜健康，有病就睇醫生。」

問到緋聞男友周志文有沒有探望她？她表示自己只住了一晚醫院，所以周志文沒有探病，但有傳短訊慰問。另外，早前Moon被指做「跟得女友」，為打籃球賽的周志文在場邊打氣，她笑指大家太敏感︰「我鍾意睇比賽，同埋當日仲有其他朋友落場。當然我都支持佢啦。」

採訪︰Pauline

編輯︰李潔盈

美術︰梁政敏