太陽馬戲團中環獻技 港首演《KOOZA》$488起

黛安每次去睇馬戲，都好佩服表演者可以做出咁高難度嘅動作！世界知名嘅太陽馬戲團（Cirque du Soleil）會喺明天（19日）起至6月3日喺中環海濱活動空間演出，仲會帶埋首次喺香港表演嘅劇目《KOOZA》，喺馬戲團十分有標誌性嘅黃藍馬戲帳篷度上演，門票由$488至$1,888不等。

《KOOZA》會將兩種傳統馬戲演出形式，包括雜技表演、同小丑藝術融為一體。黛安睇咗其中兩個表演項目嘅綵排，包括疊騎平衡單輪車同埋花式呼拉圈，男演員喺好細嘅單輪車上抱住另一位女演員做高難度動作，真係睇到拍攔手掌！

總監Dean Harvey話，《KOOZA》由構思到首場演出，花約2年，呢個劇目已經演出咗超過10年。陣容方面，包括超過20個唔同國家50名雜技演員、樂師、歌手同埋演員，佢話演員們非常專業，當中仲有出生自馬戲團世家嘅演員，相信每晚都可以擦出唔同火花。

《KOOZA》講述小朋友「Innocent」尋找自我嘅故事，飾演Innocent嘅Cedric Belisle形容角色好平和，為令自己投入，每次演出前都會聽柔和音樂。衣櫃主管Alex Surridge就話，成個衣帽間收藏咗過3,000件演出服裝同道具，今次會動用約200件。