極地馬拉松 紀嘉文出盡汗水淚水

極地跑馬拉松，絕對係能人所不能。11位泛亞洲地區嘅跑手，參加咗「富衛北極馬拉松2018」，最後香港半馬紀錄保持者紀嘉文以7小時17分09秒獲得第18名。

賽事喺挪威時間15日晚開跑，圍繞北極北緯89度冰川跑，氣溫只有零下32度，對跑手嚟講係好大挑戰。紀嘉文話，過程比想像中辛苦，特別係一呼一吸冷空氣時，感覺快要窒息，「係用汗水、冰水、淚水換來」，但好enjoy，好有意義。

公關姐妹話，今次參加者亦包括殘障以及業餘運動員，世界馬拉松大滿貫跑手植永強就做領跑員，同香港盲人體育總會會員、視障跑手梁小偉拍住上，以10小時30分03秒跑畢全程，奪得第42名。梁小偉話，「第一次嚟到北極，條路好難跑，係一次好好嘅人生經歷。」植永強就話，活動中識咗好多新朋友，特別多謝一班工作人員，陪伴大家完成賽事。