失落金像影后 鄧麗欣反戥阿澤唔抵

憑《空手道》早成為雙料影后的鄧麗欣（Stephy），日前雖然失落金像獎「最佳女主角」，但她前晚出席電影《起底組》煞料宴時，坦言未有失望，只緊張自己是否以最靚狀態出席盛事，又表示替《空》片導演杜汶澤失落「新晉導演」獎感到不開心。

金像獎頒獎禮曲終人散，首次角逐影后的Stephy最後敗給毛舜筠，她笑言有點失落，因感覺就像完成一個大騷，反而對於輸掉影后不覺失望。她說︰「當晚其實無去諗賽果，反而成個頒獎禮回憶令我好深刻，自己就最緊要靚，件衫真係好鍾意，贏咗『最佳衣着獎』算係對借衫畀我嘅人有交代，呢個對我嚟講唔係安慰獎。」

Stephy又稱，頒獎禮前收到很多打氣的留言，就算爭輸亦收到不少鼓勵短訊。提到舊愛方力申透過傳媒鼓勵她繼續努力，她表示沒有收到小方的短訊：「我會保持初心，因為我真係好鍾意做戲，咁樣令我更有動力同目標，期待下次再有提名。」對於好友阿澤失落新晉導演獎，她說：「有少少唔開心，另外《藍天白雲》都有唔少提名，其實我好想梁雍婷攞新演員，獎項係一種鼓勵！」

游學修想追Stephy

同場的游學修在《起底組》演喜歡查案的宅男，他笑言以為可以與Stephy演情侶，誰知只得幾場對手戲。他更自爆向來視Stephy為偶像，問他會否展開追求？他連聲表示︰「如果佢單身，我誓死追佢，不過有雜誌話佢好似拍緊拖喎！」他大讚Stephy不但是他心中女神，更相當有義氣，因早前他邀Stephy客串電視劇，對方二話不說答應：「我收到佢回覆嘅Message時，簡直有種夢中嘅感覺。」

採訪︰Pauline

攝影︰林良明

編輯：李潔盈

美術：梁政敏