回憶父親叮囑 放下執着 胡兆康重拾比賽樂趣

香港賽馬會最新出版嘅《駿步人生》，黛安發現今期有「保齡神童」胡兆康，喺「Go！青一族」分享咗佢人生中嘅甜酸苦辣，喺佢成功背後，亦因為壓力，而令自己手震、失眠，甚至令佢運動生涯停滯不前，後來因為爸爸一句說話，而放低對勝負嘅執着，黛安覺得，康仔真係為大家傳遞正能量！

今年33歲嘅胡兆康，8歲就開始打保齡球，坊間傳聞過佢第一次打就打咗個全壘打，但佢就澄清無啲咁嘅事，「有打到全中，但不是一打就全中」。康仔加入港隊已經19年，做過保齡球世界冠軍、7次當選「香港傑出運動員」、兩次摘下「香港最佳運動組合」，但原來佢亦曾經歷手震、失眠，甚至因個人健康問題，而徘徊喺體育事業十字街頭。

康仔話，2011年爸爸患癌去世，自己都喺2014年患上睾丸癌，壓力愈積愈多，「過分思考勝負，也很在意賽前賽後和記者交代嘅說話，緊張到比賽時會手震，賽前三個月已失眠、坐立不安」。最後佢諗起爸爸一句叮嚀︰「別太緊張，放鬆點。」，先放低對勝負嘅執着，重新揾番原動力，去享受打保齡球嘅過程、比賽嘅環境同氣氛。

羅致光局長細個愛刨馬經

而今期《駿步人生》封面人物係IQ高達160嘅勞工及福利局局長羅致光（CK），佢真情剖白一啲成長趣事。CK話，細個時有輕微讀寫障礙，會調轉數字同部首，小學最鍾意睇報紙，甚至會刨馬經，認真到有本「數簿」，同專業馬評人較技；鍾意「講數」嘅佢，仲試過因為去澳門見人玩21點，專門寫個程式計一計，結果印證入賭場「十賭九輸」嘅定律。而當年第一份工做咗3年後，就重返校園讀社工，然後從事社會政策研究，因為佢相信所投入的時間，會有更加大的社會效益。