周四推「手撕雞安格斯」漢堡 麥當勞驚喜口味新登場

自從麥當勞推出The Signature Collection之後，已經成為黛安新寵。最近收到風，今個星期四（26號）Signature Collection又有新口味登場，竟然係「手撕雞安格斯」漢堡，咁驚喜嘅口味，唔知又會唔會一試愛上呢？

公關姐妹話，今次係由星級廚師楊尚友（Christian Yang）炮製，靈感來自佢當年留學法國時，留意到烤雞係當地人嘅傳統家庭菜式，所以試下以秘製肉汁風味醬加入嫩滑嘅手撕雞肉，帶出法式烤雞精髓，配上香濃、分量十足嘅安格斯牛肉，將兩種唔同風味嘅食材mix and match，加上香烤蘑菇、爽口紫椰菜、軟滑白芝士、香辣洋蔥醬，啖啖肉勁香口啊！

歎完全新法式風味漢堡，梗係唔可以錯過滋味十足嘅「大大啖」組合！只要購買任何超值套餐，再加$7.5，就有黑松露風味醬配薯條，同充滿柚子果香嘅「柚子特飲」，再加入雜果粒粒，非常refreshing！配上「手撕雞安格斯」漢堡絕對好食到停唔到口！