社企Image Pro畢業作品展 用微電影發放正能量

微電影雖然時間好短，但蘊藏嘅意義可以好大。東華三院屬下嘅社企Image Pro映誌高日前就喺柴灣青年廣場舉行咗第3屆「映像夢啟航計劃」學員嘅畢業作品展—「看見我」，作品展除咗有畢業生嘅攝影作品睇之外，仲首次播放咗4部由畢業學員製作嘅微電影。

黛安知道，微電影嘅主角係香港善導會嘅更生人士，學員仲同佢哋有深入嘅對話。學員分享嘅時候就話，希望電影唔單止可以令更生人士有機會分享佢哋嘅故仔，亦希望喺生活上遇到唔如意嘅人可以從中得到鼓勵。微電影其中一位更生人士就透過微電影獨白，分享自己過去嘅經歷，佢嘅經歷無令佢放棄要成為魔術師嘅夢想，反而令佢更用心經營同魔術結合嘅咖啡廳，將歡樂帶畀更多人。