初次執導愛情片 克勤拒演怕拖累票房

李克勤昨日到電台宣傳新歌，他透露原定今年將首次自編自導電影，但因時間不夠要押後進行，克勤更笑指若電影蝕錢的話，有機會變成最後一次做導演。

克勤宣傳新歌《單身狗》，他透露今年主要籌備國語碟外，最近幾乎每個周末都北上商演「賺人仔」。他說︰「其餘時間就做番湊仔公，朝早六、七點就送兩個仔返學。」克勤前年轉投英皇唱片後，曾執導新歌《一個都不能少》MV，有鋪導演癮的他，本計劃好今年開拍首部「處男」電影，但最終要投放更多時間準備劇本而宣布押後。

對獎項隨緣

克勤透露將執導愛情片，講述現代人愛情故事︰「我會搵一個團隊去寫，大綱寫好晒，為咗唔影響票房，今次除咗演出，我咩都會做，目標係唔好蝕錢，如果蝕錢嘅話，分分鐘第一次執導會變最後一次，我仲想有第二次。（想角逐新晉導演獎？）虛名嘅嘢隨緣，做人唔好好高騖遠，做好手頭嘅工作先。」

撰文︰倪小珊

編輯︰李潔盈

美術︰梁政敏