低卡飲食成趨勢 太興推有「營」新餐單

潮流興食得有「營」，黛安都唔例外，平時食雞都鍾意去皮。太興就同營養師黃凱詩合作，推出「太興食住瘦秘笈」餐單，包括去咗皮嘅招積雞胸飯、至「營」雞扒飯、𠮩𠹌燒肉飯同埋特「瘦」叉燒飯，卡路里都係介乎500至530千卡，夠晒健康！

黛安噚日去咗「食住瘦」發布會，現場星光熠熠，仲見到「神奇小子」曹星如，佢話自己好鍾意食叉燒，仲話太興推出咗特「瘦」叉燒飯啱晒佢，好想即刻食，佢亦透露之前因比賽而傷咗嘅左眼，傷勢恢復得唔錯。

講番今次嘅重頭戲，黛安知道，「食住瘦」係以普遍香港男女建議每日卡路里攝取量做基礎，即係男士2,350千卡同埋女士1,850千卡。黃凱詩就話，今次餐單除咗去皮雞肉同特瘦叉燒外，仲比一般嘅餐膳少咗大概一半卡路里，好似招積雞胸飯只得大概500千卡，雞胸肉嘅脂肪唔止低啲，又含豐富蛋白質，仲有助補充運動後肌肉流失。黃凱詩仲話，每款餐膳都建議選配檸檬水，因有助腸道蠕動！

太興飲食集團董事兼總經理（太興營運）何小鋒就同黛安講，集團特別揀選大眾最鍾意嘅皇牌燒味做嘗試，係希望突破傳統，令燒味都可成為適合有「營」人士嘅餐單。

聽公關姊妹講，太興全港分店喺下個月2至4日就會舉行太興「食住瘦」體驗日，凡堂食惠顧任何飲品，可以1蚊換購「食住瘦」4款飯其中一款，真係超抵！太興飲食集團董事兼總經理（品牌及企業發展）陳淑芳就話，低卡飲食會係業界大趨勢，今次推出嘅有「營」健康燒味飯只係頭炮，未來仲會有好多健康選擇。