黛安
黛安

孫中山史蹟徑今全新啟動 還原當年歷史味道

發佈時間: 2018/04/26

孫中山史蹟徑今全新啟動 還原當年歷史味道

政府早年撥款活化孫中山史蹟徑已經完成,項目今日開幕,旅遊事務署仲喺修復過程中,發現孫中山先生當年喺香港華人西醫書院畢業嘅謝師宴餐單,總共有20道菜,非常豐富!

話說1892年香港華人西醫書院第一屆畢業生得2個人,其中一位就係孫中山。而菜單所見,第一道菜就係蘇格蘭水魚湯,之後主食有水煮三文魚、烤牛扒、涮羊肉、松露乳鴿配蘋果泥,仲有沙律、甜品等,總共20道菜,估唔到兩位畢業生準備咁多好嘢食。

黛安同旅遊事務專員黃智祖(Joe)好熟,之前Joe擔任政府新聞處處長時就經常聯絡,早前黛安應Joe邀請去親試一下當年嘅謝師宴菜式。

今次係由半島酒店主理,最特別係將當年20道菜融合成5道主菜同1個甜品,就好似烤牛扒配薯仔,個薯仔融合咗3種煮法,首先用水煮熟之後切半,將上層造成薯蓉再成個拎去焗,務求重塑番當年嘅味道,認真厲害!

Joe就話,孫中山史蹟徑已經有超過20年歷史,希望喺修復中加入新氣色,所以特別邀請咗一班年輕嘅建築師同藝術家嚟幫手,包括建築師謝錦榮,佢最為人熟悉嘅作品包括柴灣青年廣場。而一班年輕藝術家就會喺史蹟徑加入藝術元素,呈現孫中山當年嘅歷史片段。

香港華人西醫書院係港大醫學院前身,黛安之前就收到醫學院為130周年出版嘅《大醫精誠》,係由院長梁卓偉撰寫,其中一章就講到孫中山曾經係醫學院學生之一,仲有埋佢讀書時嘅解剖學考卷,而佢喺1923年重臨港大陸佑堂嘅合照,更係校史最珍貴嘅紀念之一。

撰文: 黛安 消息特靈八卦公關
欄名: 八卦名利場