新世界K11 Atelier今晚開幕 建世界級Victoria Dockside

新世界近年重點打造嘅Victoria Dockside，第一期寫字樓K11 Atelier喺今日開幕，黛安噚日有機會先睹為快。

黛安對呢個地方好有感情，因為細細個就跟Daddy去「小紅館」海城大酒樓飲茶，黎明都曾經喺度表演，又去星光大道、文化中心一帶行街食飯睇節目。聽新世界公關姐妹講，100年前呢度係藍煙囱碼頭，連接第一條通往內地嘅九廣鐵路，之後新世界買入地皮建成新世界中心，係全港首個集商場、酒店同服務式住宅於一身嘅商住區，新世界執行副主席兼總經理鄭志剛（Adrian）細個仲住過，同影壇巨星林青霞、鍾楚紅、葉蒨文做鄰居；又搞過LEGO國際展覽、港京拉力賽等城中盛事。

黛安參觀時發現大堂唔似一般辦公大樓，反而似一間好chic嘅酒店，為配合「Dockside」主題，天花、大堂接待處同咖啡廳嘅木牆，特別用咗回收船木，夠心思又環保。

坐擁270度維港景嘅K11 Atelier，8樓全層有跨國共享工作間，對住無敵海景，一定創意澎湃。姐妹仲話，K11 Atelier會同兩間海外同內地知名嘅共享工作間營運者合辦國際級「Pitch Night」，每周都請各界名人出席，幫start up開拓國際視野同人脈。

嚟緊下個月起營運香港K11 Atelier Academy，會向租戶同員工每季提供500節課程，包括瑜伽班。