孫中山史蹟徑重開 以藝術品呈現歷史

孫中山先生曾經喺香港生活，喺香港中上環一帶有唔少同孫中山有關嘅古迹。由旅遊事務署、中西區區議會及康文署推動嘅孫中山史蹟徑更新計劃完成，噚日舉行啟動典禮，黛安有幸出席。今次計劃邀請咗9位本地藝術家，以藝術品更換史蹟徑依家用緊嘅紀念碑，今次計劃其中一位策展人謝錦榮同黛安講，原先嘅紀念碑已經用咗20幾年，舊嘅紀念碑都用相片同文字去介紹，比較沉悶，所以佢希望透過今次翻新，提升遊客去了解更多歷史嘅興趣。

謝錦榮今次嘅作品叫「中央書院」，佢話孫中山曾經讀過中央書院高中部，後來書院搬遷至鴨巴甸街及荷李活道交界，並改名做皇仁書院。謝錦榮話，為咗今次創作搵靈感，佢仲特登去咗皇仁書院舊生會資料庫搵資料，希望作品可傳神將孫中山讀書嘅場景表現出來。

而另一個參與創作嘅藝術家黃國才，佢嘅作品「楊衢雲遇刺處」，就喺百子里公園附近，即孫中山戰友楊衢雲遇刺嘅地方，以銅製藝術品重現楊衢雲形象，佢嘅藝術品仲刻上「赤道之陽光，北極之冰雪」，表現咗革命義士凜然之氣。

增加QR Code 聲音導航介紹

旅遊事務專員黃祖成話，愈來愈多人鍾意自由行，嘅街上不時見到有旅客拎住本書自己周圍行，為迎合呢批旅客嘅需要，所有藝術品都有二維碼（QR Code），旅客只要用手機掃一掃，就可以連到網站，甚至會有聲音導航，俾旅客了解更多。

佢仲話遲啲「大館」中區警署建築群開放，連埋旅發局「舊城中環」活動，可將中上環一帶打造成文化景點，等旅客知道香港唔止購物，仲有文化深度遊！黛安今個星期六都要約埋姊妹去行下史蹟徑了解下歷史！