日內閣總理大臣助理官 訪港推廣琉球泡盛酒

黛安平時鍾意歎番杯，噚日就去咗中環PMQ出席日本國駐香港總領事館有份搞嘅「琉球泡盛酒之夜」，仲見到日本政府內閣總理大臣助理官宮腰光寬。佢提到今次訪港之行，前日同政務司司長張建宗見面，傾咗關於旅遊同日本食品出入口嘅事務。佢仲話，截至舊年，本港已連續13年成為日本農產品最大嘅出口市場，未來會進一步引入豚肉等產品。

佢又話，JETRO香港事務所、香港日本料理店協會、香港日本食品及料理業協會、同埋國際廚藝學院4個團體，已簽咗為期3年嘅合作備忘錄，希望促進香港同日本飲食文化交流，仲會搞好多唔同類型活動，包括「日本秋祭in香港2018」同埋喺國際廚藝學院舉行嘅日本產食材烹調工作坊，推廣日本菜融合中國菜概念。

公關姊妹同黛安講，日本清酒同埋威士忌喺香港好出名，而琉球泡盛酒喺日本就有好多年歷史，希望將呢款酒進一步推廣嚟香港。