開騷爆曾被高層嫌無價值 趙學而︰我講過要爭氣

趙學而前晚首踏紅館舞台舉行個唱，尾聲時講出心底話，自爆在事業低潮時被高層直指作為藝人已經「無價值」。完騷後，學而坦言要多謝對方，否則沒決心繼續在圈中行落去。樂迷齊聲為學而感到驕傲；有粉絲更高喊有洋蔥！

入行接近30年的趙學而，前晚在紅館舉行一場《RIGHT ON TIME演唱會》，吸引多位圈中好友包括陳奕迅、袁詠儀、江若琳等捧場。當晚入座率達九成，表演嘉賓則找來曾經同屬飛圖唱片的張智霖，二人合唱Chilam的經典歌《現代愛情故事》。

到Encore部分，自稱「而婆」的趙學而訴說「那些年」的不快回憶︰「曾經有個位高權重嘅人，話我作為歌手、藝人或演員都已『無價值』；之後有另一個高層則同我講︰『你唔唱歌唔使死』，所以我上次開騷都講過，做人要爭氣。」她又指路遙知馬力，廿多年（上紅館）都等到，後面日子無人知，但每個人都為自己選擇嘅路去堅持。學而的「真心話」贏盡全場掌聲，隨後獻上《誰明浪子心》，為個唱寫上完美句號。

觀眾撑再戰紅館

完騷後問她哪位是「位高權重」的人，學而心情輕鬆，但堅拒多言︰「我話咗唔講就唔講！」坦言要多謝該位高層，否則不會有決心繼續行落去。她又說最重要是為自己爭氣。再追問誰指「你唔唱歌唔使死」？她說：「我曾經講過係一位男性高層，你哋慢慢估喇！」

雖然今次只開一場，但有觀眾支持她再戰紅館，學而笑言︰「講係咁講啦，呢啲嘢好有靈活性，真係要睇大家支唔支持，如果有機會當然想喺唔同嘅場地演出。」至於粉絲們也稱讚學而的紅館個唱真心正，喜見她的Good Show證明其價值。

撰文︰Steven、Pauline

協力︰阿瑤

編輯︰陳禮恒

美術︰梁政敏