《魔海奇緣》隆重登場 慕安娜同你拯救海洋

迪士尼首個擴建發展計劃項目《魔海奇緣凱旋慶典》已完成，將喺今個月25號正式開幕。噚日迪士尼就率先介紹新表演內容，黛安都有幸參與。

電影《魔海奇緣》嘅故事，係講來自蒙圖努爾島嘅慕安娜（Moana），聯同半神人茂宜歷盡艱辛，成功歸還萬物之母迪菲娣嘅心嘅故事。香港迪士尼樂園度假區娛樂事務及服務部創作總監華文迪（Randy）同黛安講，《魔海奇緣凱旋慶典》係根據動畫《魔海奇緣》改編成嘅20分鐘表演，亦係全球迪士尼樂園首個以《魔海奇緣》為主題嘅表演。

Randy話，今次係香港迪士尼首個互動舞台演出，例如每場會揀12至16名小朋友幫手打鼓，為劇中壞蛋角色椰殼海盜做勢，亦會邀請全場觀眾大喊劇中角色「茂宜」嘅名，激勵佢出手救慕安娜。表演會由6位演員一人分飾多角，佢哋會透過唔同嘅肢體動作，聲綫，同道具去表現角色。佢話演員都好專業，扮嗰樣似嗰樣，唔怕觀眾會混淆。

噚日Randy安排咗演員即場表演一段，演員首先飾演村民，但突然見佢戴起蟹殼，仲打橫行，黛安就知佢已變咗做一隻蟹，相當厲害！

今次新建嘅演出場地，位於探險世界嘅樂韻叢林，場地可容納約300人，Randy話，為咗表現電影中濃厚嘅波利尼西亞文化，佢哋做咗大量資料搜集，舞台設計及服裝上都一絲不苟，好似場地上蓋嘅帳篷顏色係由人手畫上去，劇入面亦有超過30件道具，係由全人手製作。

為反映小島風情，戲服仲特登用上進口天然拉菲草，演員跳舞時，身上嘅拉菲草會發出「沙沙」聲，相當有特色。節目咁精采，大家點可以錯過！