逾250學童蒙眼用餐 體驗視障生活

大家都知道眼睛係人嘅靈魂之窗，黛安噚日去咗玫瑰崗學校參加由奧比斯搞嘅「蒙眼午餐」活動，有超過250個小學生參加，齊齊感受無咗視力帶嚟嘅不便。其中一位有份參加、讀緊小學4年班嘅同學趙恭寧就同黛安講，蒙住眼食飯好困難，因為搵唔到餐具，又開唔到飯盒，真切體驗到視障者嘅苦況。

同場仲見到奧比斯義務眼科醫生李琬微，佢話如果小朋友一出世就有大細眼，情況持續到1歲後，就有機會患咗眼瞼下垂。雖然喺香港唔常見，但若忽略病徵，可能會因錯過視力發育黃金期而導致永久弱視，最嚴重可能剩番1成視力。醫生仲話，大細眼嘅情況係指，若眼珠黑色位置畀眼瞼覆蓋多過1毫米，或眼珠黑色位置多過五分一畀眼瞼覆蓋，就可界定為眼瞼下垂；病徵仲包括肩頸痛，醫生會因應眼瞼下垂程度而決定做唔做手術或者做定期跟進檢查，黛安真係要提醒下身邊嘅家長朋友，注意子女嘅眼睛健康了。