今年無暇開騷 張智霖棄紅館檔期

每年紅館的檔期都爭得頭崩額裂，一些黃金檔期更要預早一年入紙申請，已四年沒有在紅館開騷的張智霖（Chilam），本來今年已成功申請，但他卻以工作排得密麻麻為由推掉。

新片《死亡通知單暗黑者︰首部曲「雙雄會」》昨日舉行啟動儀式，Chilam在片中與吳鎮宇及古天樂等鬥戲。飾演警察的Chilam表示角色處於精神不穩定狀態，坦言怕太入戲︰「我會小心處理，演員係一個玩自己嘅行業，情緒經常大上大落，我會靠運動放鬆。」

已四年沒有在紅館開個唱的Chilam透露，原定今年底開騷，不過他已推掉，「如果要搞演唱會，我呢一刻已經要開始準備，不過今年真係行唔開。（畀期你都唔要，唔怕紅館下次唔畀你？）唔好呀！因為真係想認真去做，想每次都做到最好，我發覺做演員同歌手好難兩全其美。」

古仔無影帝包袱

這是古天樂當影帝後首部電影，他說︰「今次會演四個角色，有爛面、跛同埋唔講嘢、要靠肢體語言，四個都唔同特質，同樣係復仇心重嘅人，做賊對付吳鎮宇同張智霖。」其中兩個角色要化粧四個鐘，古仔笑言要訓練一下脾氣。

飾演鑑證科專案小組女警的周秀娜（Chrissie），角色有收藏屍體相片的怪癖，她笑言不怕︰「好多時都係道具，演員拍完都會彈起身一齊食飯啦！」

撰文：Pauline

編輯：黃卉彤

美術：梁政敏