太古坊上演原創英語音樂劇 演盡上班族趣事

打工仔除咗返工之外，相信都會有自己公餘興趣。黛安就知道太古坊同香港青年藝術協會合作，嚟緊會舉辦原創英語概念音樂喜劇《PROJECT AFTER 6︰Cube Culture》，由30位嚟自不同年齡、職業、文化背景嘅人一齊演出，將搞笑嘅「扮工」文化搬上舞台！

公關姐妹話，呢30位演員有會計師、律師、大專生等，雖然背景唔太相同，但同樣咁鍾意舞台演出，大家經過4個幾月嘅training，喺下周五做第一場演出！

舞台劇故事就係以辦公室做主綫，好似有港鐵上班之旅、煩悶冗長嘅電話會議、浪漫愛情故事等，用幽默對白，串盡辦公室奇人異事。而且今次嘅幕後班底非常厲害，有香港青年藝術協會創辦人Lindsey McAlister做編導、英國電影和電影藝術學院獎（BAFTA Awards）及艾美獎得主Nick Harvey編寫原創音樂。

Lindsey希望劇中各個小單元，都可以引起觀眾嘅共鳴，同反思自己日常上班生活和工作。

咁精采嘅音樂劇將喺今個月11、12、18、20、25和26號，於太古坊多用途藝術空間ArtisTree上演，門券即日起喺Ticketflap公開發售，門券收益全數捐去香港青年藝術協會。成人票價100蚊，全日制學生及年滿60歲或以上人士票價係50蚊。黛安已經買咗飛去睇啦！