美國舉行婚前派對 阿嬌搵辣妹賀未婚夫牛一

鍾欣潼（阿嬌）昨日到金鐘出席品牌活動，近日忙於籌備美國婚前派對的她，透露此行會順道為未婚夫賴弘國慶祝生日，更會安排火辣女Dancer為未婚夫賀壽，夠晒新潮。

阿嬌昨日為英國女裝品牌BORA AKSU任開幕嘉賓，更獲設計師送上兩幅肖像油畫。阿嬌本月25日完成美加巡迴演唱會後，便會到美國舉行婚前派對，她透露此行雙方父母不會同行，他們也不會在賭城註冊，純粹與好友狂歡，阿嬌表示︰「總之就唔使搞咁多嘢，係一次朋友聚會。」

籌備婚禮無進展

除了舉辦婚前派對外，阿嬌亦會為本月28日生日的未婚夫慶祝，她自爆︰「有朋友提議搵班性感男舞蹈員嚟派對跳辣身舞，但我驚尷尬，想像唔到個畫面。」反而她想邀請火辣女舞蹈員到場助興，她笑笑口表示︰「我唔會送自己畀佢，但會叫定女Dancer，而且一定要靚同好身材。」

原來今次是兩人拍拖以來，未婚夫首個生日，阿嬌坦言為生日禮物傷腦筋，她說︰「佢鍾意一隻懷舊款金色手錶，但我覺得唔抵，依家仲諗緊買唔買。」她又自言不心急出嫁，因此仍未揀婚紗，籌備婚禮亦沒有新進展，但透露會在美國影婚照︰「到時咩款式婚紗都試下，唔會買，會借嚟影相。」

撰文︰倪小珊

攝影︰林良明

編輯︰李潔盈

美術︰李明