坑口新食街 歎築地鮪魚壽司

將軍澳坑口商場多，但要搵食只得連鎖食肆選擇。早前坑口街市完成翻新，街市旁邊有條集合了近20間小食店的食街。炸雞翼、黑松露碗仔翅、芋圓、即製壽司……最重要是小食街位於室內而且有冷氣，無論天氣炎熱，或者落大雨，也不會影響你掃街的心情。

即握壽司 【鮪世市場】

街市內的壽司店都可以好有水準！壽司店由擁有15年日本料理經驗的主廚坐鎮，店內所有壽司全部即叫即握，刺身更落重本，幾乎每日由築地直送，夠新鮮。招牌作「鮪壽司盛」，即是吞拿魚壽司拼盤，有齊大拖羅、中拖羅等不同吞拿魚部位的壽司，刺身厚切，口感不錯。

創意雞翼 【豪園小食】

小店由美食車做到變實體店，將人氣大熱的炸一字雞翼做招牌小食。原味、車打芝士、蒜香醬油、黃金鹹蛋炸一字雞翼外，今個月又有新口味--脆炸雞翼淋上用香橙味香檳，再加新鮮橙汁煮成的醬汁，酸酸甜甜的味道可以平衡炸雞翼的油膩。

台灣芋圓小食 【Gourmet Tasty】

港式、日式小食都有齊，又怎少得台灣小食？這裏必食台灣三色芋圓配豆腐花或仙草，芋圓煙韌有咬口。即叫即製手抓餅，有7款配料追加；炸雞扒中間有流心芝士餡，勁邪惡！

半溶芝士腸粉 【Snacks Factory】

蒸腸粉簡直是香港經典小食之一，除了配麻醬、甜醬之外，還可以有其他變化？小食店一於來個中西Fusion，將茄汁肉醬淋於腸粉上，加半溶芝士，夠惹味。小店更有泡菜辣醬腸粉、黑松露碗仔翅等創新港式小食。

Info

TKO Gateway Food Lane

地址︰TKO Gateway東翼地下Food Lane

營業時間︰10am-10pm