「舊區‧新點子」建築設計賽 IVE生砌冰屋創意滿分

年輕人充滿創意，更有學生以新點子應用喺舊區重建。市建局同職業訓練局（VTC）轄下嘅香港專業教育學院（IVE）首次合辦「舊區‧新點子」創意工程及建築設計比賽，上星期三係總決賽評審，當日有同學提出一個外形看似愛斯基摩人嘅冰屋作品「DOME山再起」，仲奪得「最優秀大獎」同「最具創意獎」，黛安見到呢個作品，都驚嘆年輕人思維創新，更重要係可以改善長者生活。

市建局行政總監韋志成、非執行董事許智文教授同VTC副執行幹事廖世樂博士都係比賽嘅評審。韋志成話，市建局推動市區更新時，好着重促進社區共融同可持續發展，同學仔嘅創意設計，畀咗唔少啟發市建局，可善用多元社區空間，促進社區鄰里關係，佢當日仲即場將結構同用料嘅建議畀同學仔，希望日後佢哋可以將創新意念變成真實，畀舊區居民享用。

畀空間長者舒展筋骨打牙骹

就讀IVE建築設計及科技學2年級嘅同學仔方靜，就係「DOME山再起」作品嘅創作者之一。佢話，同隊員親身到多個舊區實地考察，仲同長者街坊傾偈，發現舊樓住嘅大多係行動不便嘅獨居長者，平時都好少外出，所以諗到喺舊樓天台裝個圓拱形嘅戶外休憩設施，可以有空間畀長者舒展筋骨，仲可以同街坊打下牙骹。

韋志城又話，今次嘅比賽着重參加者需先掌握問題所在，所以透過導賞活動將市建局改善舊區居住環境嘅理念與同學仔分享，令佢哋對舊區老化嘅問題有深入認識同了解後，才去構思設計。黛安見到啲作品咁「貼地」，相信同學喺考察時真係切實諗過居民嘅需要。