梁詠琪完成紅館個唱計劃造人 粉絲︰專心生個囝囝啦

梁詠琪（Gigi）假紅館舉行的一連兩場《好時辰世界巡迴演唱會》香港站前晚圓滿落幕，相隔七年再開演唱會的Gigi，在舞台上展現不一樣的自己，除了勁歌熱舞之外，更大騷性感，令觀眾眼前一亮。完成個唱後，Gigi宣布向老公「交人」，計劃為愛女Sofia增添一名弟妹，不少粉絲都舉腳贊成，祝願偶像造人成功。

前晚多位圈中好友到紅館撑Gigi，包括楊采妮、黎芷珊、谷祖琳、AGA、陳明憙、林建名及金培達等，Gigi老公Sergio連續兩晚帶同女兒到場，全場即時起哄，受歡迎程度絕對拍得住媽咪。

揚言要唱盡廣東歌的Gigi，全晚獻唱多首經典金曲掀起歌迷集體回憶，她亦唱了送給女兒的歌《My Little Sofia》，熒幕更播出Sofia的生活片段及相片，可愛度爆燈，Gigi更形容女兒是她的女神︰「佢好靚、好索，好多人鍾意佢，亦帶畀我好多歡樂，我好開心，但好攰，湊女仲攰過返工。」

爆囡囡凌晨唱兒歌

Gigi在encore環節唱了三首歌，最後以一曲《高妹正傳》完美謝幕。慶功宴上，Gigi直言花盡性命完成這兩場演出，歌迷的熱情亦令她非常感動。提到頭場時不慎被咪高峰撞損嘴唇？Gigi表示︰「喺握手環節，歌迷太熱情，撞到我支咪，我支咪又撞到我個嘴，流咗少少血，但無乜事。」她又透露，首次坐觀眾席欣賞她演出的女兒Sofia，在睇完頭場演唱會回家後，心情亢奮，Gigi大爆︰「我凌晨一點返到屋企，佢仲喺度唱緊兒歌，我話你唔瞓我都要瞓。雖然佢對住鏡頭好怕醜，但返到屋企就好奔放，呢兩晚對佢嚟講係幾震撼嘅回憶。」

至於是否要「交人」給老公開始造人？Gigi謂︰「係呀，要交人，但先要支持我老公啲童裝生意，之後就可以休息，休息已經包括造人。（開Part 2？）生完再諗。今次相隔七年開個唱都是好的，有多啲人生經歷同歌迷分享。」

對於偶像開到口要休息造人，不少粉絲都大表支持，更希望Gigi可以為Sofia生個弟弟，湊成「好」字。

撰文︰Pat、Steven

協力︰Terri

編輯︰黃寶恩

美術︰Simon