搞Talk騷慶祝「登六」 陳志雲王喜互窒當宣傳

今年是商台邁向60周年台慶大日子，亦是陳志雲「登六」的重要人生里程碑，為慶祝這個值得紀念的時刻，商台製作《志雲尋志雲登陸舞台演嘢會》，由7月20至22日假香港理工大學賽馬會綜藝館舉行，以「登陸」及「尋夢」為主題。昨日記者會上，陳志雲更以由頭綠到腳的傘兵造型出現，令全場驚喜。

大會請來王喜擔任記者會司儀，可是他卻遭陳志雲擺上枱開玩笑，二人同台互相揶揄，先是陳志雲出場時在台上「碌地沙」，王喜即笑他︰「又唔係溫碧霞，做乜典地啫！」陳志雲即反擊︰「你喺TVB做得唔好，喺商台做一陣又走，依家又去有線，都唔知會唔會拖累有線！」

大彈王喜演技

談到嘉賓方面，陳志雲透露已邀得曾俊華、陶傑等，還有謝安琪、張繼聰等也答應上台，問到與他「關係深遠」的黎耀祥會否獲邀？陳志雲即表示與祥仔的關係應該是語重心長，此時王喜反問︰「我長啲定黎耀祥長啲？」志雲妙答︰「咁就要睇功能性同角度喇。」

又提到王喜、譚小環及黎耀祥曾合演劇集《緝私群英》，祥仔當時只屬配角，志雲戥祥仔不值，更乘機踩愛將︰「王喜，佢幾好戲，但都唔及黎耀祥囉！佢同譚小環呢兩件都唔識做戲，王喜本身樣貌平庸，演技一般，2000年出咗本寫真，聲稱賣斷市，我就唔信，可能出五本，一家幾口啱啱分晒。」問陳志雲會否學王喜操肌才開騷？他笑言不會，免得相形見拙。

提到現已公開售票，志雲笑指︰「唔求秒殺，只求月殺，黃子華係『金盆𠺘口』，我就金盆開口。」活動後志雲受訪時解釋，一身造型是整個團隊構思的，代表雷霆傘兵一直向前衝。「呢個造型用咗兩個鐘化粧，落粧都要個半鐘呀。」他又說為這個騷付出很多，但強調內容不談政治。對於今年將「登六」，陳志雲稱不是關口，當年邵逸夫爵士60歲才開始搞TVB，任何事永遠都不會太遲。

採訪︰Pauline

攝影︰林良明

編輯︰陳禮恒

美術︰梁政敏