合演舞台劇Solo兩分鐘水袖舞 馬浚偉︰我驚定欣打我

馬浚偉近日忙於為六月底再度上演的舞台劇《偶然‧徐志摩》進行綵排，他昨日出席活動時，透露首次演出舞台劇兼飾演陸小曼的胡定欣，將會單獨挑戰一part超過兩分鐘的水袖舞，又自爆與定欣有一幕激咀纏綿戲，令人期待。

馬仔昨日以頒獎嘉賓身份出席「第十屆香港小劇場獎2017-2018」，他透露連日來都與身在新疆拍外景的定欣緊密聯繫，馬仔表示︰「我今日臨時揀咗一首純古箏樂曲畀定欣，佢會一個人喺舞台上跳兩分十秒的水袖舞，仲要跳足11場，所以我驚佢會打我，因為真係好有難度。」

將激情延續下去

定欣曾於08年參加《舞動奇跡》奪得季軍，雖然她有中國舞底子，不過馬仔表示中國舞與水袖舞完全不同，他說︰「我會要求佢有跳躍動作，佢信心一定有，但會有壓力。」

定欣除了個人solo外，亦與馬仔有親熱場面，馬仔表示︰「我同定欣拍完《宮心計2深宮計》後，監製梅小青話我同定欣喺劇中的纏綿戲同談情戲做得好好，好似戀愛多年，所以我想將呢個情感放喺舞台劇上面，延續嗰份激情。」

同鍾嘉欣傾合作

而日前馬仔亦與短暫回港的「契妹」鍾嘉欣和陳法拉飯聚，他透露和嘉欣談了很多未來大計，包括舞台劇及音樂上的合作，馬仔謂︰「我用朋友同大佬身份同佢傾，希望我公司可以全力幫佢，但最重要係佢決定仲生唔生BB，我驚佢生完呢個轉頭又話生第三個。」此外，馬仔又大爆法拉正考慮演出美國大型舞台劇，他說︰「係同好top的演員合作，我話做啦，仲考慮咩？呢個衰妹睇嚟應該屬於荷里活發展，叻女。」

撰文︰倪小珊

編輯︰黃卉彤

美術︰梁政敏