《經濟通》智慧城市峰會 下月隆重登場

創科係未來大趨勢，港府都不斷打造香港成為Smart City。黛安知道下月11號，香港經濟日報集團旗下嘅《經濟通》，會喺香港會議展覽中心舉辦第一個由傳媒機構籌劃嘅「香港智慧城市峰會2018」暨「香港智慧城市大獎2018」，嚟自各界別嘅精英將雲集探討，點樣推動香港成為世界級嘅智慧城市！

香港經濟日報集團執行董事兼經濟通董事總經理史秀美話，Smart City係一個顛覆性轉型，喺呢個過程入面，非常需要傳統商界同民間支持。《經濟通》作為領先嘅專業財經資訊平台，希望透過籌組「香港智慧城市峰會」同「香港智慧城市大獎」，搭建一個交流平台，促進工商科技界創造協同效應，借助發展Smart City帶嚟嘅機遇，戰略性推動資訊科技發展同應用，再配合政府創科發展政策，一齊提升香港喺區域經濟中嘅競爭力。

10機構企業猛人參與

《經濟通》嘅姊妹仲話，出席峰會嘅機構同企業猛人輩出，包括騰訊香港、智慧城市聯盟、香港數碼港管理有限公司等共10間。智慧城市大獎會由香港城市大學電子工程系副教授曾劍鋒博士、香港市務學會主席凌羽一博士等共8位評審，根據創新及創意、功能、質量、市場潛力、裨益及影響力5大準則，甄選出傑出企業或組織，表揚喺構建智慧城市上所作出嘅貢獻。大會設6個獎項組別，包括「智慧出行」、「智慧生活」、「智慧環境」、「智慧市民」、「智慧政府」同「智慧經濟」。

作為評審團主席嘅立法會資訊科技界議員莫乃光跟黛安講，今次嘅大獎係希望鼓勵業界積極追求創新，開拓多方合作同繼續發掘人才，合力推動智慧城市發展。得獎名單會喺當日頒獎典禮上公布，黛安都十分期待！