下周五光影音樂派對 閃耀中環海濱

黛安收到風，中環海濱活動空間下星期五至日，會舉行首個以燈光效果做主題嘅《光影遊樂園》，星期五仲會有免費嘅戶外音樂派對。互動嘅燈光效果、同駐場DJ送上強勁音樂，咁hyper一定好正啊！

公關姊妹話，《光影遊樂園》由營運同管理中環海濱活動空間嘅Central Venue Management（CVM）呈獻，由Serious Staging製作，係香港第一個以燈光效果做主題嘅露天樂園。活動分做不同區域，有互動藝術展、燈光風車園、手作工作坊同DJ派對等，為期3日，由下午3點玩到晚上10點，仲完全唔需要入場費。

姊妹仲話場內用太陽能發電音響系統，用再生能源包括太陽能同踏單車動能發電，為音響設備供電。而兩位駐場DJ分量十足，包括DJ Sophistakid同DJ Fabsabs。快啲約埋朋友Chill Out啦！