首間電競聯賽中心 打機設施免費玩

打機唔再係宅男嘅專利，更有可能係一份有前途嘅職業。香港電競聯賽公司為咗畀大家放膽踏出第一步，宣布開設全港首間電競聯賽中心，無會費、可免費用所有設施，仲有飲品零食提供，講到明要打造成「電競界Starbucks」！

電競中心位於石門京瑞廣場，面積約有800呎，可容納40人，有16張電競椅。公關姊妹話，除咗飲品零食之外，其他無任何收費，每日打開門口歡迎大家入嚟打機，親身體驗電競係咩一回事，駐場會有工作人員講解，希望令電競更普及化。

中心有兩個會員計劃，第一個為傳說會員，會費全免，可免費使用場內所有電競設備同參加活動，仲可以半價享用場內飲品；第二個係皇者會員，只要喺半年內參加中心舉辦嘅電競活動10次，包括任何比賽或聚會，並進入決賽1次，即可免費享用3個月任飲優惠，價值1,988元，仲可獲贈充電寶、同以優惠價購買場內電競產品。