黛安
黛安

可持續時裝 365日都着得

發佈時間: 2018/05/11

可持續時裝 365日都着得

唔好以為舊衫就一定係霉霉爛爛,其實佢哋可以好有用,甚至可以再造成全新嘅靚衫。23位正就讀香港理工大學時裝設計相關課程嘅碩士生,最近就巧妙咁運用咗剩餘嘅織物或者棄置嘅衣物,創造出可變化嘅跨季時裝!一件衫都可以千變萬化,黛安以後就唔使追求速食時裝、造成浪費啦。

呢個理大同H&M合力創作嘅系列,以變化設計、實用功能、促進可持續發展為靈魂,不限年齡、季節、性別同場合都着得,而且仲加入依家最潮嘅運動服元素!例如Jessica特大外套男同女都着得、Luna大褸打開之後可以變成一張軟綿綿嘅絨被、Shubhi三件套裝可以變成上衣、長褲,甚至短裙同連身裙都得!全套系列都係理大學生嘅設計,同埋以可持續發展物料製成,完全打破咗傳統設計嘅框框。

理大時裝與紡織品設計碩士課程總監Basia Szkutnicka話作品主題係「Clothes we live in」,係一套注重功能、現代化嘅365+1系列,全年365日都可以着!H&M大中華區可持續發展部經理Hanna Hallin大讚學生們靈感無限,創作出好多新穎作品,挑戰現今製作時裝嘅方式。

撰文: 黛安 消息特靈八卦公關
欄名: 八卦名利場