到銅鑼灣從來不愁沒美食落肚，每棟食廈樓下總是自帶一批「傳單黨」，不想在花多眼亂中作出錯誤選擇，就要做足research，做個精明的「target eater」。今次帶你到耀華街掃韓式潮菜、高性價比意大利菜、懷舊玩味酒吧，再回到軒尼詩道chill歎蟹宴，下次再到銅鑼灣就有新選擇。
1. $148吉列牛定食（Kobekyu吉列牛忌廉烏冬專門店）
吉列牛gimmick十足，韓日式不拘，近年皆火速成為食肉獸新歡，脆香吉列皮配入口即溶的juicy牛實在令人無法抗拒，邪惡極致。不過本地有得食吉列牛的地方實在不多，幾個月前就有新店襲港，更以吉列牛及其絕配忌廉烏冬為主打，齊齊粉墨登場。
韓迷一定聽過晚晚大排長龍的人氣食店Kobekyu，幾個月前Kobekyu登陸銅鑼灣及旺角，以後不夠經費「回鄉」，也可來吃個忌廉烏冬，燒片吉列牛一解「鄉愁」。
店主Ivy從事韓國時裝批發足足8、9年，飛韓國入貨兼旅遊是例行公事，正想轉型的Ivy太喜歡Kobekyu的吉列牛，於是把心一橫談來代理權，在香港獨家代理Kobekyu。Ivy笑指︰「我哋呢一代年紀嘅人識做嘅嘢唔會好多，都係好basic呢啲傳統行業。」雖然Ivy形容自己「呢一代」，不過做得時裝，自然近貼潮流，一做就做又hit又有gimmick的款式。Kobekyu有韓國本店支援，食物質素有保證，韓店一有新款又會馬上update，更有韓國師傅駐場，除了口味上為遷就港人而有所微調，其他方面還原度仍然極高，哈韓族想在本地解「鄉愁」不再是夢。
Kobekyu吉列牛忌廉烏冬專門店
地址：銅鑼灣耀華街3號百樂中心22樓
電話：3427 8822
營業時間：星期一至日，12nn-10:30pm（10pm Last order）
2. $148 龍蝦薄餅（Barg）
與朋友聚餐，夾時間固然是世界級難題，其次就要數找個合適地方；要夠體面又要有新鮮感，食物質素不在話下，性價比卻要夠高，以防孤寒鬼「詐型」，最好附近有bar可以隨時轉場，方便談得興起時暢飲一晚。位於百樂中心1樓的Barg正是個好選擇。
銅鑼灣不缺品質西餐選擇，不過論性價比，Barg絕對是出眾之輩。餐廳的海鮮多用空運貨，卻是貼地價錢，不足$150可歎個全人手搓皮薄脆香的足料波士頓龍蝦pizza，每塊都有鮮甜龍蝦，人人有份，永不落空；又或者以親民價食個法式蟹肉虎蝦多士，一桌人齊齊歎好西兼打卡。值得欣賞的是餐廳某些菜式可因應客人需要多做半份，讓客人開心share又不怕食剩做「大晒鬼」。
畢竟難得一聚，聚餐最具意義的環節除了點到全枱食物，當然少不了瘋狂自拍還有世紀大合照，照片背景又豈可失禮？Barg每張椅都有獨特風格圖案，更有chill爆U形梳化卡位可選，加上格調暗黃燈光，坐得梳乎、影得靚相，最抵讚是餐廳逢五、六晚及公假前夕都會化身酒吧，食完大餐可以摸摸酒杯底傾個夠，走到樓下大街更有足足6、7間bar任君選擇、任君轉場，下次約食飯，不用再愁找地方，不過當然，首先你要轟炸在水底的老友上水應機。
Barg
地址：銅鑼灣耀華街3號百樂中心1樓
電話：2834 4114
營業時間：星期一至四及日，12nn-3pm、6pm-11pm；星期五、六及公眾假期前夕，12nn-3pm、6pm-3am
3. $29自家製鮮白甘筍片（賣点 MY.DEA by ZUC.CCH.ERO）
銅鑼灣不缺酒吧，酒吧街最近就開了間懷舊又搞鬼的玩味手工啤酒吧，裝潢充滿本土味︰霓虹燈裝飾、飛行棋餐牌、櫃上用模仿九龍皇帝的字迹寫住經典廣告對白、懷舊信箱、燈掣、雪櫃與熱水壺……打卡位超多，就連兒時最愛的街機都可任玩，童年回憶湧現！
店子是創作甜品店ZUC.CCH.ERO的姊妹店，幾位店主本身閒時都會齊齊飲酒吹水，覺得手工啤酒chill得來味道夠多變，於是決定開店，並將店子設計成時下流行又充滿回憶的懷舊風。主打的手工啤酒，選擇有近50款，分別是本地、台灣與歐美品牌。本地品牌有大家都熟悉的大圍啤、Heroes、麥子、鬼佬及門神，為了撑本土，於5:30pm-8pm來幫襯本地啤更會有75折。台灣手工啤則有55街、浮光、風土及艾爾等，都是店子特地託台灣朋友於當地物色的品牌，香港罕見。
台灣啤口味變化多，分別加入柑橘、巧克力、糯米、咖啡、番薯等釀製，風味獨特。下酒食物相當有心思，像爆谷灑上竹炭粉再shake勻，變成形到爆的黑色爆谷，又如店子無大路的花生、薯片，反而有炸白甘筍片，味道淡甜也相對健康。店子大玩本土味，由細食到大的餐肉出前一丁、咖喱魚蛋等在這裏都可食到，親切感十足。
賣点 MY.DEA by ZUC.CCH.ERO
地址：銅鑼灣耀華街26號地下
電話：2577 0809
營業時間：星期一至日，5:30pm-3am
4. $128爆蛋櫻花蝦蟹甲羅燒（蟹慶）
日本蟹專門店不是新鮮事，香港零星的幾間，大都只供應套餐，質素不俗，但吃一頓蟹宴每人接近兩張「大牛」，荷包大出血！銅鑼灣的「蟹慶」有點不同，有蟹餐又有蟹料理，傳統、創新風味有齊，有貴有平，衝着香港人愛靈活愛花款兼吃得精明的個性！
這麼熟悉香港人喜好，皆因餐廳請了日籍料理達人Kei San杉內馨監修。Kei San有雙重身份，他來自北海道，另一方面居港逾30年，既熟悉日本海產，又深明香港人最緊要有得揀。所以他設計的menu花碌碌，有全蟹套餐，有大堆頭活蟹海鮮盛合，有散點蟹刺身天婦羅蒸蟹浜燒蟹腳蟹鍋蟹釜飯，刺身、蒸、煮、炸、燒、鍋物一網打盡，連創新食法足足30幾款。
初次來小試牛刀，散點是good choice，當中最吸引眼球的幾款，是Kei San參照小時候見過吃過而設計。「我叔叔以前喺北海道捕蟹，我由細食蟹食到大，就試下將北海道漁師同家庭式嘅地道食法帶來，希望有新鮮感。好似甲羅溫清酒，就係以前嘅漁師喺岸邊取暖時飲。」Kei San說。將清酒倒在甲羅中，加小匙蟹膏即席在火爐上煮熱，蟹膏加酒香散發，將殼端在嘴邊呷一口，辛甜酒味與甘濃蟹膏混合，味道介乎酒與蟹湯之間，果然好暖胃。
蟹慶
地址：銅鑼灣軒尼詩道525號澳門逸園中心地庫
電話：2602 1600
營業時間：星期一至日，12nn-3pm、6pm-11pm
撰文︰何美澄
協力︰Carol
攝影（部分）︰林良明
插畫︰何樂
編輯︰余運慶
美術︰招潤洪