短訊祝賀做爸爸 千嬅讚樂仔更定性

楊千嬅昨日為演唱會DVD舉行簽名會，提到好友余文樂的太太日前順利誕下兒子，已恭喜樂仔的她，大爆對方一索得男勁開心，更指樂仔榮升父親後會更加定性。

千嬅完成無綫新劇《多功能老婆》日本外景回港後，昨日現身尖沙咀為「楊千嬅三二一Go！演唱會2017」DVD舉行簽名會，她與兩位帶住小朋友的媽媽歌迷大玩遊戲，當中要畫媽咪的樣子，千嬅自爆Torres平時畫她的樣貌，都會畫成三角形，笑指勁似巫婆，她解釋說︰「Torres好鍾意睇《哈利波特》嘅詭異造型，畫我哋一家都係三角形。」

唔強求生女

對於老友樂仔「升呢」做爸爸，千嬅透露已用短訊祝賀對方，但未有機會見BB。「佢好顧家，依家做咗爸爸會更加緊張屋企。」千嬅仍未想好送甚麼禮物，又指樂仔已周身潮牌，所以買衫要好小心。她說︰「雖然係小朋友出世，但都可以送畀佢太太。（分享湊B心得？）生完開頭係最辛苦，傷口未癒合，又要餵奶，我諗樂仔好樂意幫手，因為佢好開心。」

問千嬅會否考慮生個女？她坦言曾經想過，但決定等上天安排：「如果個天覺得楊千嬅可以有多個女，我當然Welcome，但我都有好多嘢追求，求事業、培養個仔，都係一種愛，我無壓力嘅。」

撰文︰倪小珊

編輯︰李潔盈

美術︰招潤洪