下周二長洲太平清醮 7成食肆唔賣葷

一年一度嘅長洲太平清醮會喺下星期二佛誕舉行，黛安當日都會去湊下熱鬧兼食齋。聽講，今年有70%至80%食肆都會遵守齋戒期，喺20至22號唔賣葷，認真唔話得。

太平清醮係長洲嘅傳統活動，以前打醮期間必須禁止殺生同進行齋戒，成個長洲得素食供應，但隨住時間改變，大部分食肆都同時「賣齋又賣雜」，即係素食同肉食同時有得賣。

太平清醮值理會副主席何麗安就同黛安講，今年值理會上門同200間食肆逐間傾，希望說服佢哋唔賣葷，暫時有67間應承咗，3間會賣雜，整體估計有70%至80%會守齋，比舊年得50%至60%增加咗，「大家都明白就算會影響生意都會做，唔賣葷嘅店會休息（暫停營業）。」其中一間多年嚟都堅持齋戒習俗嘅長洲康蘭餅店，東主郭予泉就話，所有含奶嘅蛋糕、椰撻、香芋味平安包都唔會賣，只係得黑芝麻、蓮蓉等傳統口味，「無擔心過影響生意，我哋係長洲人，一定要咁做！」

響應齋戒期只吃素

而重頭戲飄色巡遊，何麗安話，今年有19台飄色，做主角嘅小朋友全部都係5歲左右，膽量非常大，已完成好「試色」，即係測試小朋友會唔會畏高，係唔係適合做「色芯」（角色）。佢仲透露立法會搶手機事件衍生出「卿峯作浪」飄色戲碼，呢個亦都係長洲「飄色王」黃成就嘅退休告別作。

佢估計當日可吸約5萬人次入長洲，希望大家玩得開心、睇得開心。