黛安
黛安

天文台宋文娟囝囝:未落雨媽咪就叫收衫

發佈時間: 2018/05/14

天文台宋文娟囝囝:未落雨媽咪就叫收衫

如果講「宋文娟」呢個名,大家未必知佢係邊個,但一睇到佢個樣,就會知係「報天氣嗰個」!噚日母親節,天文台特登訪問咗高級科學主任宋文娟同佢囝囝,原來當年阿囝仲未出世,就已經跟媽咪上電視報天氣,佢哋一齊睇番當時自己「陀B」報天氣嘅片段,仲同囝囝講「你嗰陣喺我個肚郁嚟郁去,我都好似若無其事」,黛安真係覺得好溫馨。

每逢打風落雨,港人最關心就係翌日有無假放,宋文娟囝囝都好坦白咁話:「每次聽到媽咪話個風打唔成,就覺得好灰」,又話佢細個時,媽咪成日未落雨就叫佢收衫,覺得媽咪講嘢好準,大個先知道原來媽咪係科學家,黛安聽完都覺得好好笑。

宋文娟又話,香港好多女性要兼顧工作同家庭,佢提醒各位媽媽要同囝囡多傾偈,但唔好只傾功課,要多啲傾囝囡有興趣嘅話題。

撰文: 黛安 消息特靈八卦公關
欄名: 八卦名利場