沙田新戲院MOVIE TOWN 暑假開幕

黛安係戲迷，收到風得知裝修咗一段時間嘅沙田新城市廣場戲院，今個暑假終於開幕，新戲院大樓正式命名為「MOVIE TOWN」，營運商由洲立影藝MCL接手。面積達3.5萬平方呎，有7間影院、逾1,700個座位，最吸引係只要經商場手機App買戲飛，即刻免收10元手續費，仲係永久㗎！

黛安噚日就同新地一班好姊妹食飯慶祝，姊妹話項目投資額達4億元，引入最先進科技，包括全球第7間採用Samsung最新無投影機嘅「Onyx Cinema LED」銀幕，同全港首間全制式RealD Cinema，形容做「終極銀幕」，有齊RealD 3D系統、Dolby Atmos全景聲音響系統、Buttkicker系統震動座椅，一定係睇3D電影嘅最佳選擇！

新地代理有限公司租務部總經理林家強（Henry）話，自己喺沙田長大，以前睇戲要係室外排隊買飛，好天曬落雨淋，但依家大部分人都喺網上或手機App買飛，所以不如免收手續費啦。佢仲預告，嚟緊以指定付款方式，就可以只要195元買3張2D電影禮劵，連10元爆谷套餐或熱狗套餐現金劵3張。

先進設備 最佳睇戲享受

洲立影藝總經理黃寶珠就話，為畀大家多啲選擇，首次推出中式北京填鴨捲餅、意大利三文治、港式門神手工啤酒等國際美食。至於票價，Henry話會參考附近戲院票價，但唔會將成本轉嫁消費者，價錢一定大眾接受。