新五虎紅館合體 基仔古仔勁講有味笑話

古巨基前晚舉行第四場紅館演唱會，請來95年無綫「新五虎」成員古天樂、劉愷威、吳家樂及何遠恒任嘉賓，眾人在台上合唱《當年情》後，再合體重影當年舊照片，更吹水互窒，笑爆全場。

經歷墮台事件以致頸背受傷的基仔，前晚在舞台上依舊載歌載舞，十分專業。到嘉賓環節，基仔特地向觀眾介紹︰「好難得，上次約得四個差一個，今次幾經辛苦搵齊五個。」然後四虎升上舞台，跟基仔大講有味笑話互窒。古仔取笑基仔︰「哈，你都好嘢，咁都無事，堅挺即係堅挺！」基仔即笑道︰「我巨肌嚟吖嘛！」古仔︰「哦，你就係落台嗰下靠條巨肌撑一撑先無事呀？」基仔︰「係呀，我動L咁彈番轉頭！」吳家樂亦插嘴︰「唔怪得Lorraine（古太）跟你咁多年啦！」

笑何遠恒甩拖

現場播放五虎舊合照，眾人即席擺出當年同一個甫士合照留念。四虎趁基仔換衫時繼續聚舊，久未露面的何遠恒讚基仔是好男友，誰知被古仔取笑說︰「我最近睇新聞，你同個咩彩華散咗，係咪嗰晚無同我哋食飯去咗滾，所以搞到散呀？」何遠恒尷尬說︰「唔好講呢啲喇！」而劉愷威則取笑基仔（手汗）好濕，令觀眾爆笑。

拒絕跳「拜神舞」

有現場觀眾點唱古仔的經典歌《今期流行》，更響起《今期流行》音樂，而何遠恒和吳家樂即席大跳古仔「拜神舞」，令古仔不禁苦苦求饒︰「唱歌可以，但舞就唔好迫我跳啦！我拜神拜咗咁多年，唔好搞我啦！」最後四虎跟基仔合唱《我愛毛查查》，跟觀眾握手後才返回後台。

撰文︰倪小珊

編輯︰李潔盈

美術︰梁政敏