黛安
黛安

一田購物日又到 下周四起買足5日

發佈時間: 2018/05/16

一田購物日又到 下周四起買足5日

五月係瘋狂購物月,下周四起有一連5日嘅「一田購物優惠日」,而「MegaBox 1折激安感謝祭」亦於今日起至下月10日舉行,筍貨陸續有來,黛安真係要儲定彈藥,為血拼做好準備。

「一田購物優惠日」下周四(24日)起,有過萬件貨品會以低至2折起發售,其中唐老鴨旅行篋就由原價1,980元減至699元。一田CEO黃思麗同黛安講,世界杯就快開鑼,會重點推介睇波必備小食,當中有近期好hit嘅鹹蛋脆魚皮,原價58元一包減至69.9元兩包,仲有變頻分體冷氣機由原價4,498元減到2,480元。黛安知道,今年一田仲將優惠日參與嘅分店由以往9間增至10間,仲會喺荃灣廣場、新蒲崗Mikiki、元朗Yoho Mall I、將軍澳東港城同旺角Moko商場增設5個特別展場。

黃思麗話,優惠日期間會同綫上代購外送服務平台honestbee合作,首推代購送貨服務,以一田西環店做試點,喺honestbee網上或流動程式落單,就有專人代購,即日送到,但送貨地點只限港島區。佢又話,一田喺上周三率先喺eShop開賣300款筍貨,截至14日嘅登入人次達8萬人,人均消費600元。

除咗一田,MegaBox今日至6月10日舉行第四屆「1折激安感謝祭」,其中禮拜六(19日)同6月2日會有「1折激安購物日」,過千貨品1折發售,當中包括Samsung 32吋內置全高清電視機,仲有200件貨品只係賣1元,包括罐頭鮑魚同三文魚刺身,而iPhone X(64GB)就以7折發售,由原價8,588元減至6,011元。

撰文: 黛安 消息特靈八卦公關
欄名: 八卦名利場