退休後首會客 李嘉誠晤Spotify創辦人

李嘉誠退休之後，李嘉誠基金會嘅微博噚日第一次update，仲hashtag「#李嘉誠退休後嘅首位客人」。原來係同有份投資嘅Spotify創辦人Daniel Ek喺香港見面，距離第一次見面已經係9年前啦。

誠哥話，當年25歲嘅Daniel故作成熟，但聽到佢嘅心路歷程同宏願後，覺得Daniel有原則、有義氣、有自律精神、為人真誠，決定無論Spotify成功與否，都會參與A輪投資。Spotify今年成功上市，李嘉誠就同Daniel講，投資Spotify所賺嘅一分一毫，都會用喺基金會嘅公益項目上。

經常周遊列國嘅誠哥，原來未去過瑞典，但佢話對瑞典千島之美十分嚮往，仲曾經睇過《康有為在瑞典》電影，康有為形容瑞典的斯德哥爾摩湖泊、森林係「天下無有」。