尾場慶功 基仔直認跌落台留陰影

古巨基一連五場紅館個唱前晚大功告成，雖然基仔在第二場發生墮台意外，傷及肩頸肌肉，之後當他再次行過大窿，都不忘自嘲︰「見過鬼怕黑，我見過嗰隻鬼都幾大隻，所以都幾怕黑。」慶功時，基仔憶述當日墮台事發經過︰「當時係有知覺，一秒之後覺得背脊撻咗一下，才意識到原來我跌低，覺得痛時已經喺地下，背脊落地，真係不幸中嘅大幸。」

基仔又指工作人員曾提議停騷，但他堅持無大礙就繼續演出，老婆Lorraine陪他睇完醫生才安心下來。意外發生後，基仔有做物理治療，並安排治療師在後台為他按摩肌肉。

提到尾場Encore時機關失靈，基仔笑言對比跌落台已是小事，「我睇得好透，大難不死必有後福，每晚返到屋企都同老婆講真係好好彩。」問他造人計劃如何？他即笑指︰「先醫好頸傷吧！」

此外，尾場嘉賓是基仔視為哥哥的鄭伊健，兩人合唱《一個為你甘去蹈火海的人》，兩人擁抱後，基仔笑指他們欠了歌詞中的「再度重新激烈擁吻」，說罷即扮激吻，全場爆笑。