青年廣場Y旅舍 8本土藝術家為客房添活力

就快到暑假，好多人都會去旅行。黛安就知道青年廣場同一班本地年輕藝術家合作，用原子筆、混凝土等，幫8間Y旅舍客房重新設計同加入新元素，包括藝術家含蓄、小塗蛙、練黑等等，真係每間房都別具特色！

公關姊妹話，今年青年廣場推出Artisan@Y Loft 2018活動，同8位嚟自唔同背景嘅本地藝術家合作，包括Mr. Hammers、練黑、含蓄、小塗蛙、雲千藍、陳詠藍、黃世傑及小橘子，用原子筆、塗畫（Doodle）、混凝土、手寫字等，幫8間Y旅舍客房重新設計。每間房都由佢哋繪畫出心目中同香港息息相關嘅情景，更反映出依家年輕人對社會嘅觸覺同看法。

好似藝術家含蓄，佢負責設計一間雙人房，將喺香港唔同小角落收集到嘅小故事同小人物，變成人像，再用塑膠彩畫喺牆上，希望話畀大家知，無論多平凡嘅人，都有佢嘅價值，每一個人都應該珍惜當下。

望作品向各地旅客展示

另一藝術家Mr. Hammers，就覺得香港有90%建築物都係用混凝土建造，但就畀油漆、磁磚等裝飾蓋過，希望透過房間嘅混凝土設計，畀住客親手觸摸到混凝土。

青年廣場義務總幹事呂施施話，今次搵咗一班80、90後年輕藝術家，希望可以將佢哋嘅作品，透過客房向世界各地旅客展示，而旅客又可從中了解香港年輕人嘅想法同欣賞到香港特色。

如想入住咁有特色嘅房間，只要係Y旅舍網上系統，或者facebook訂房時註明要求預訂Artisan Room就得啦。姊妹話，為咗畀更多人認識，Y旅舍亦都會由即日至6月4日假Y展覽平台舉辦主題客房展覽。