Le French May法式市集 進駐D2 Place

法國出咗名係浪漫之都，每年5月喺香港都可以感受到呢種浪漫氣氛，今年D2 Place就同法國5月Le French May合作，舉辦集電影、美食、工作坊同手作市集於一身嘅《法式盛薈French Extravaganza》，其中包括嚟緊兩個禮拜六晚（19及26日）7點至10點，喺D2 Place一期天台花園舉行嘅「電影之夜」，現場仲有特色飲食攤檔同免費爆谷，免費入場㗎！黛安知道，D2 Place會送免費啤酒或小食券，畀每場放映會頭80位入場人士，先到先得，送完即止。

黛安仲知道，今年大會首度舉辦一連3日（5月18至20日）嘅法式市集，除咗可以品嘗到法國海岸直送嘅新鮮生蠔同三文魚外，仲有好多主題工作坊可以報名參加。