《光影遊樂園》登場 一連3日玩轉中環海濱

位於中環海濱、全港首個《光影遊樂園》今日至星期日正式登場！活動請嚟本地重量級藝術家設計，布置成一個遊樂園，有鞦韆、氹氹轉、小木馬等，好有童真，加上千變萬化嘅燈光效果，一定好instagrammable！

公關姊妹同黛安講，佔地達1.5萬平方米嘅《光影遊樂園》，分做好多個園區，好似互動藝術展、燈光風車園、結合本土情懷同燈影效果嘅遊樂園、手作工作坊同DJ派對，3日活動完全免費入場，啱晒情侶、朋友、一家大細enjoy同relax，欣賞下香港夜景之餘，仲有得玩、食同聽音樂。

本地藝術家 築起勁有feel風車

姊妹仲介紹，今次主辦單位Central Venue Management（CVM）特別邀請咗兩位本地著名藝術設計家，Jay Hofmann-Forster同葉小卡幫手設計燈光裝置。葉小卡設計咗一個叫做《海風下》嘅風車園，幾十座藍色風車裝置，象徵香港昔日嘅漁港情懷，迎住海風，真係好有feel。

Jay Hofmann-Forster就參考當代心理學家卡爾•榮格學說，創作咗多款神話原型，天馬行空，加上奇幻光影同互動效果，充滿玩味。藝術園區核心仲有一座逾4米高嘅龐然大物《怪獸》，以充氣造型同詭秘透光效果營造巨魔嘅感覺。另有以《母》、《蛇》、《樹》、《考驗》、《獸》、《靈》為題嘅設計，6款作品平均有3米高。Jay話，唔少城市人都壓力爆錶，希望透過有趣好玩作品，等大家平衡一下。

現場仲有光影手作工作坊，包括製作海洋水光燈、宇宙星空小夜燈、夜光瓶掛飾等，可親手做出屬於你自己嘅手藝作品。黛安已約定班姊妹一起去打卡啦！