迷你劇《東方華爾街》扮高官 吳鎮宇︰官員要學我演技

吳鎮宇早前參演美劇形式製作的華語迷你劇《東方華爾街》，在劇中扮演政府高官的他，直言現實中的官員，應該睇該劇參考其演技。「有時睇新聞，覺得啲官員咁流嘅演技，就唔好出嚟扮，今次我就要示範畀啲官同議員睇！」

由福斯傳媒集團與企鵝影視聯合出品、劉德華監製、黃國強執導的原創迷你劇《東方華爾街》，將於明晚首播。劇中主要演員吳鎮宇、張孝全及蔡潔早前接受訪問，提到鎮宇在劇中飾演高官，他自言完全沒有參考真正政客的說話神態︰「佢哋講嘢講到一嚿嚿，又眨晒眼，笑容又永遠得一款，應該佢哋學番我哋，正如好多外國總統都會由演員教佢哋presentation！」

示範政治「嗱渣」招

故事講述20年來亞洲金融變遷，觸及97年金融風暴和08年金融海嘯。鎮宇表示劇集不會只談經濟︰「我演官員，又有議員拉票、語言偽術，畀大家睇下官場『嗱渣嘢』，仲會有一啲真係發生過嘅事，好似掟催淚彈咁。」

鎮宇強調劇集沒有政治立場，催淚彈情節亦只表達劇中人物的金融利益關係。「嗰場戲我加咗對白，當助手叫我走，我就話『咁多部攝影機對住我，我依家走，仲使有票咩？』呢啲就係官同議員嘅口面。」會否擔心題材敏感？他搞笑說︰「唔敏感就不如睇番鮑魚家族，或者愛回家食餐飯算啦，唔敏感我拍嚟做咩，不如返去做Sam哥！」

張孝全唔識投資

至於台灣型男張孝全今次參與美劇模式製作，認為發展空間較大︰「電影節奏比較快，很多東西都限制在90、120分鐘內；相反今次拍劇，角色的『厚度』較多，（演來）也更過癮。」

張孝全自言不懂金融，所以開拍前特地惡補一番。「一開始拿到劇本，內裏的理論我完全不懂，要惡補後再唸兩、三遍才明白，但現在還是不懂投資！」至於首度拍劇的蔡潔，坦言最開心是跟一眾靚仔型男拍劇，劇中更對孝全有曖昧情愫，令她十分享受。

師徒決裂

高雲城發展局副局長葉抱一（吳鎮宇飾）與「三大金融巨鱷」官商合作，操縱市場從中獲利。當初他引領金融奇才韋航（張孝全飾）回來，部署新一場金融風雲。兩人曾經是地下金融精英隊伍「CASH」十年來最親密的戰友，可惜時移世易，韋航遭出賣後，從此跟葉抱一勢不兩立，並自組新一批「CASH」成員。

吳鎮宇

髮型：Joe Kwong

化粧：Kargo Leung

場地：W Hong Kong

張孝全

髮型：Stone

化粧：Amber Yen-Diva Taipei

撰文︰李潔盈

攝影︰梁細權

編輯︰陳禮恒

美術︰梁政敏