TOPick辦「玩學嘉年華 × STEAM 2018」 嚟奧海城邊學邊玩

依家嘅小朋友除要學習書本上嘅知識，仲要識思考同解決問題，寓玩於學同STEAM正正係近年嘅教育hot talk！經濟日報集團旗下嘅TOPick，會喺嚟緊嘅星期五（25日）至日（27日），喺奧海城舉辦「玩學嘉年華×STEAM 2018」，大家一齊邊學邊玩！

TOPick姐妹同黛安講，嘉年華會結合科學、科技、工程、數學同藝術於一身，現場設有多個以STEAM為主題嘅攤位遊戲，鍾意科學嘅小朋友，唔單止可體驗做實驗嘅樂趣，仲可運用做實驗獲得薪金，學習理財之道。姐妹話，現場就有渣打銀行嘅理財專家，同小朋友灌輸正確理財概念；另外，仲可以參加由香港科技園公司準備嘅迷你科學示範工作坊，齊齊同科學玩遊戲。

就算對科學唔感興趣，小朋友都可化身做考古人員，挖掘出「恐龍骸骨」，利用加入AR技術嘅4M Dinosaur DNA系列進行基因解密，恐龍實境即刻會呈現眼前，仲可同來自史前嘅龐然巨物來個世紀合照，帶返學校「曬相」。

姐妹仲話，一連三日嘅嘉年華邀請咗多名專家同家長分享STEAM教育嘅好處，包括升學專家趙榮德、梁永樂，會同家長分享「從小快樂學好英文裝備迎接直私小學面試」、「拆解面試陷阱決戰小一叩門攻略」；化學科老師李偉瀚（Chemsir）會喺現場示範科學魔術同講解箇中原理；Lego大師洪子健就會同大家暢談，點樣用Lego鼓勵孩子發揮創意；電子程式工程師媽媽Monica Leung，會教導小朋友點樣學習STEAM等等。節目咁豐富，各位家長記得同仔女一齊嚟取經啊！