被邀德國開騷 農夫勁興奮

組合農夫昨日出席將軍澳商場美食街的揭幕禮，吸引不少市民圍觀，場面熱鬧。近年人氣升、密密接job的農夫，最近忙於搞巡唱，就連德國都有主辦商斟洽他們演出，令二人大感興奮。

農夫剛完成澳門站巡唱，稍後會到內地及東南亞演出，他們還透露目前有多個地方斟洽中，兩人興奮表示︰「上次在旺角麥花臣場館都話係世界巡迴演出，依家拉斯維加斯都傾緊，係咪世界性演出，算係咁啦！」陸永又自爆︰「連德國都傾緊。」

否認豬籠入水

C君笑言很期待德國有哪些人想睇農夫演出，每想到這裏都會興奮莫名，不過他們強調應該不會唱英文歌。陸永又說︰「會學定一、兩句德文同大家打招呼，但估計入場睇我哋嘅唔會係德國人。在德國人眼中，佢哋唔識聽我哋唱歌，可能係睇樣，見到我哋好靚仔喎！」

提到巡演唱不停，必定豬籠入水，他們連忙否認，問賺多幾多個零頭？陸永搞爛Gag謂︰「來來去去咪鄭裕玲，唔使多幾多個零，一個鄭裕玲就夠。」C君附和︰「如果鄭裕玲肯畀個零我就夠。」至於會否再跟嘟姐合作，他們暫時未有定案，即使合作都是做主持為主。有人提議他們在港開騷，陸永直認有人邀請，但未諗到開騷理由，畢竟每次開騷都有壓力。

撰文︰Pauline

編輯：黃寶恩

美術：招潤洪