調整換算機制 短程更着數 2萬Asia miles遊大阪

唔少港人都用亞洲萬里通（Asia Miles）儲里數去旅行，Asia Miles噚日帶來大喜訊，由下個月22號起，調整搭國泰或港龍賺取同兌換飛行里數嘅方式。黛安發現，有8成機票可用比以前更少里數換到機票，當中包括港人旅行熱點，如日本大阪，日後用2萬里數就可換到來回機票，比依家足足少1萬；另一港人熱點台北，雖然換來回機票仍維持1.5萬飛行里數，但如以單程計，日後只需7,500里，比依家1萬里，減咗2,500里。

除咗短途，長途機都有「優惠」，好似倫敦嘅頭等客艙，單程就由105,000里減到10萬里，洛杉磯特選經濟客艙單程就由4.8萬里減到4.5萬里，但大部分特選經濟、商務及頭等長途嘅里數就加咗小小，好似來回紐約嘅商務機票由14.5萬里加至17萬里。

公關姊妹同黛安講，日後國泰或港龍嘅獎勵機位供應會增加20%或以上，機票將改為單程兌換，方便旅客去程或回程選擇唔同客艙級別；但如果換國泰、港龍以外嘅其他航空公司機票嘅里數計算方法就無變。Asia Miles仲更新咗網上兌換系統，等大家換機票時一目了然！

Asia Miles行政總裁黃思遠同黛安講，Asia Miles全球會員已超過1,000萬人，聽到唔少會員意見都希望可以推出更多機位，同換機票時更彈性更容易，所以就推出今次計劃。咁着數，等黛安都睇定暑假去邊旅行先！