購清水灣豪宅自住 周柏豪畀老婆做業主

周柏豪日前以接近3,000萬元購入清水灣新盤物業，身為圈中「愛妻號」的他，直認新居寫老婆名字，他們將與王浩信一家做鄰居，兩人更相約一齊打籃球。

周柏豪、王浩信前晚為籌款節目《萬眾同心公益金》演出，兩人最近都在清水灣置業，柏豪開心表示︰「係送畀太太嘅一份禮物。（準備生小朋友？）順其自然啦，其實本來係睇樓，無諗過買，但我同屋企人都好鍾意，就有呢個決定，間屋我同老婆住，會寫佢個名。」

同王浩信做鄰居

柏豪喜歡新居位置寧靜，而且家人都住將軍澳區，問他是否方便將來湊小朋友？他說︰「所有嘢都方便啦！」對於跟王浩信做鄰居，柏豪續稱︰「其實扑鎚（購入）嗰刻佢喺我隔籬，咁啱同一時間簽約，未知幾時入伙。（是否考慮豪裝？）未決定，由太太話事，我會努力搵錢再買樓，呢個係目標。」

有報道指王浩信以3,300多萬元購入清水灣同一新盤豪宅，他表示︰「之前同柏豪打過籃球，希望到時可以同佢一齊做多啲運動。」問他會否繼續投資「磚頭」？他希望先努力搵錢供樓，太太陳自瑤都很滿意，已覺得他好叻仔。此外，王浩信前晚在籌款騷與視障女歌手蕭凱恩合唱《陪着你走》，兩人默契十足。王浩信以「盲俠」去感受，如果《踩過界》再拍新一輯，他相信會演得更好。

撰文︰Pauline

編輯：陳禮恒

美術：梁政敏