12米暴龍出沒 去ifc探索奧秘

黛安對恐龍一直都好感興趣，原來嚟緊6月7號至27號，領賢慈善基金會同ifc商場合辦「MEET THE T. REX︰探索暴龍世界」慈善展覽，12米嘅暴龍化石將會係全球首次展出！

展覽有首次公開曝光嘅暴龍化石，名為The American Dragon，出土自美國南達科他州，仲有具暴龍牙洞嘅埃德蒙頓龍脊椎同暴龍牙齒，兼且可以親手摸下具6,500萬年歷史嘅暴龍大腿骨化石。

除咗恐龍化石之外，姊妹話，現場會有6大互動展區，結合AR擴增實境技術畀大家更深入探索恐龍奧秘。現場仲有Pop-up Store售賣恐龍精品，包括香港青年插畫師Jeanie Leung《Smile With Fifi》兒童雙語繪本等，全部收益撥捐領賢慈善基金。