動夏嘉年華高歌熱舞 海洋公園玩轉日與夜

海洋公園每年暑假都有新節目，而今年就有「動夏嘉年華」，嘉年華分為日場同夜場，分別係加勒比「夏日」同「夏夜」巡遊，會由50位海外精英組成嘅表演團隊演出。

日場每日會有3場，黛安知道表演者會着上以海洋生物、野生動物及雀鳥三大主題嘅華麗服飾，當中會有表演者扮演喺海洋公園大受歡迎嘅川金絲猴，亦有高蹺好手模仿高達4米嘅長頸鹿，仲有翩翩起舞嘅石頭魚巨偶。而夜場亦相當精采，表演者會換上閃爍璀璨嘅燈飾服裝，同遊人狂歡熱舞，感覺同日場完全唔一樣。

除咗兩大巡遊，嘉年華仲有好多其他精采活動，好似怡慶坊會上演「火熱奇技大滙演」，由多個榮獲國際獎項嘅表演者演出多項高難度表演，海洋劇場就會有首次來港嘅加拿大國家隊級別韻律泳團隊，演出水中芭蕾「韻律水精靈」。小朋友亦可以去威威天地嘅「威威嬉水泡泡陣」，一家大小去玩水！

晚上嘅夢幻水都湖畔就會有聲樂表演「型樂派」同每晚駐守海濱樂園廣場嘅「DJ狂熱」，為遊客送上派對音樂！咁多節目，黛安今個暑假喺海洋公園約定你！