大館首日開放 市民探秘 重溫歷史

警署同監獄畀人一種神秘嘅感覺。中區警署建築群（大館），經10年翻新，噚日正式開放畀公眾參觀！雖然入場免費，但市民要喺網上完成登記，先可以入場。大館總監簡寧天話，開放首日，大館已經喺網上派發咗6,000張入場證，睇嚟大家都急不及待想探索下大館呢個神秘地方，其中域多利監獄嘅監倉，仲好受大眾歡迎。

噚日黛安就見到唔少遊人都去監倉「參觀」，今年63歲嘅楊生，仲專程帶埋相機「入監倉」一探究竟。佢覺得監倉部分復原到唔少細節，夠原汁原味，可具體感受到當時嘅監犯生活。而記錄咗100個街坊故事嘅「大館一百面」展覽，都吸引唔少上一輩市民入場，懷緬童年歲月。

移民澳洲30年、現年77歲嘅Hermia就同黛安分享，佢從細就喺荷李活道成長，「從屋企窗口望出去，仲會見到大館入面被押解嘅囚犯。」佢話，今次返嚟香港，知道大館正式開放，就同自己講一定要嚟參觀。Hermia話，展館嘅所有商舖，都係小時候嘅左鄰右里，行完一圈，童年回憶即刻返曬嚟！

大館將設計、藝文同古蹟糅合，一洗古蹟沉悶嘅觀感，而且展覽內容豐富，大家一定唔好錯過！